Kalendaro-kalender

Om du använder den här sidan godkänner du våra användarvillkor.

Användarvillkoren finns under menyn Om oss

Kalendaro

25
feb
Zoom
Datum: 25 februari 2021
Vill du vara med kontakta / Ĉu vi volas ĉeesti kontaktu svenska@esperantoforbundet,se

04
mar
Zoom
Datum: 04 mars 2021
Vill du vara med kontakta / Ĉu vi volas ĉeesti kontaktu svenska@esperantoforbundet,se

06
mar
Datum: 06 mars 2021
Vi planerar nästa år tillsammans. Ni kune planos la sekvan jaron.

09
mar
Datum: 09 mars 2021
Arbetsstyrelsemöte på Zoom

11
mar
Zoom
Datum: 11 mars 2021
Vill du vara med kontakta / Ĉu vi volas ĉeesti kontaktu svenska@esperantoforbundet,se

18
mar
Zoom
Datum: 18 mars 2021
Vill du vara med kontakta / Ĉu vi volas ĉeesti kontaktu svenska@esperantoforbundet,se

19
mar
Datum: 19 mars 2021
Arn berättar om det samiska språket som han studerar vid Uppsala universitet

23
mar
Datum: 23 mars 2021
Arbetsstyrelsemöte på Zoom

24
mar
Datum: 24 mars 2021
Svenska Esperantoinstitutets årsmöte

25
mar
Zoom
Datum: 25 mars 2021
Vill du vara med kontakta / Ĉu vi volas ĉeesti kontaktu svenska@esperantoforbundet,se

03
apr
Datum: 03 april 2021
Vi planerar nästa år tillsammans. Ni kune planos la sekvan jaron.

06
apr
Datum: 06 april 2021
Arbetsstyrelsemöte på Zoom

20
apr
Datum: 20 april 2021
Arbetsstyrelsemöte på Zoom

15
maj
Zoom
Datum: 15 maj 2021
SEFs årsmöte 2021 sker på Zoom kl 13

Tipsa oss gärna

Här lägger vi in allt möjligt som händer inom esperantovärlden, särskilt i Sverige och Norden.

Om du vill tipsa om flera händelser samtidigt

Skicka e-post till kalendaro (a) esperantoforbundet (.) se.

Använd då listan i formuläret för att få med all relevant information!

Namn och e-post för dig som lämnar uppgifterna

Info om arrangemanget

Vem arrangerar?

Ett förbund?
Klubb i

Mer info

Jag är medveten om att jag måste skicka in tips i god tid samt fylla i alla uppgifter för att inte riskera förseningar.

captcha

La EspeReto

TEJO eventos rete

Nova afiŝo ĉe Libera Folio

TEJO ree eventos rete – IJK plu malcertas

de Redakcio

TEJO anoncas novan retan renkontiĝon, kiu okazos komence de aprilo. La sorto de la ĉi-jara IJK, kiu laŭplane devus okazi en la ĉefurbo de Ukrainio, daŭre malcertas.

Pro la pandemio, oni devas nuligi preskaŭ ĉiujn fizikajn renkontiĝojn en Esperantujo kaj translokiĝi al la interreto. Kadre de tio, TEJO anoncas novan renkontiĝon kun la nomo ”Retoso”. Ĝi estas la unua TEJO-renkontiĝo planita specife por la reto. La evento okazos inter la 2-a kaj 5-a de aprilo, kaj partopreno estos senpaga por TEJO-membroj. Por nemembroj la prezo estos 15 eŭroj. La celgrupo estas junuloj, sed sen aĝlimo.

La ĉeforganizanto, Antonia Montaro, klarigas la celon de la renkontiĝo:

– Malkiel reta IJK, reta JES kaj la Virtuala Kongreso, ĝi ne imitos ĉeestan renkontiĝon. La celo estas montri ke retaj eventoj estas ne nur anstataŭo, sed io ripetinda kun aŭ sen pandemio. Reta evento havas la potencialon atingi multe pli da esperantistoj en pli da lokoj, kaj la teamo de Retoso celas esplori tiun potencialon.

La renkontiĝo uzos la saman platformon kiel por la reta IJK. La programo ankoraŭ ne estas plene preta, sed Antonia diras ke ĝi estos diversa:

– Mi povas promesi koncertojn, prelegojn, ludojn kaj temajn babilĉambrojn. En junulaj eventoj ĉiam aperas spontanea programo, kaj ni volas instigi al tio. Mi forte kredas ke se sufiĉe da homoj el diversaj lokoj venos, la programo estos bonega iel ajn.

La espero laŭ ŝi estas, ke Retoso iĝos daŭra parto de Esperantujo:

– La ambicio estas ke ĝi okazu almenaŭ unu fojon ĉiun jaron. Ni volas ke grandaj retaj eventoj fariĝu natura parto de nia komunumo.

Granda deziro kaj defio por la evento estas ke ĝi estu tutmonda kaj ke esperantistoj ĉie en la mondo partoprenu. La organizanta teamo enhavas homojn de Ameriko, Eŭropo kaj Azio. La teamo strebas logi homojn ĉe la periferioj de Esperantujo, kiuj kutime ne povas partopreni renkontiĝojn. Ili planas la programon por ke ĝi estu spertebla por homoj en ĉiu horzono.

Carlos Pesquera Alonso, TEJO-estrarano por kongresoj, klarigas ke pro la pandemio TEJO turnas sian atenton malpli al tradiciaj renkontiĝoj kaj pli al la interreto.

– TEJO fokusiĝas pli al retaj renkontiĝoj. Ni ne forgesas la fizikajn eventojn, sed ni vere lernis kiom malfacilas atingi tutmondecon kiam oni devas vojaĝi, ĉar multaj ne povas tion fari. Aldone, la situacio ankoraŭ estas riska sanrilate, tiel oni povas esti proksima al aliaj Esperantistoj malgraŭ la distanco. Ankaŭ en aliaj kampoj TEJO pli agas rete ol antaŭe – multaj eventoj, prelegoj, kunsidoj nun okazas rete, kaj tio estas modelo por estonta agado.

Li agnoskas la malcertecon pri la IJK, kiu estas planita por la somero en Ukrainio.

– La plano A estas okazigi la IJK-n fizike ĉi-jare en Kijivo, sed ni konscias ke povas esti ke tio ne eblos. Tial ni havas internan limdaton por anonci la nuligon, kaze ke tio neprus. Se la rezulto estos tiu, ni havos kaj sufiĉe da tempo kaj sufiĉe da sperto por organizi retan eventon, sed tio estas plano B. Ĝi estas skizita sed ne difinita.

Robert Nielsen


Pli pri la temo:



ILEI alvokas

ILEI alvokas


2021 estas ĉe ILEI elektojaro. La nuna Estraro nombras sep membrojn. Ĝis nun almenaŭ tri estraranoj retiriĝas, ne kandidatiĝas por plua trijara mandato. Do la Elekta Komisiono devas trovi novajn membrojn por la gvida instanco de la Ligo.


La elektoj okazos rete kadre de la 54-a ILEI-Kongreso, kiu havos eble renkontiĝon en Kotonuo, Benino, sed havos tutcerte virtualan parton kun komitatkunsidoj. Tiu kongresa semajno komenciĝos la 7-an de aŭgusto 2021.


Se vi pripensas pri kontribuo al tiu valora laboro, nepre partoprenu la Duan Forumon de ILEI-gvidantoj, kiu okazos rete sabate la 6-an de marto. La evento aperas en www.eventaservo.org. Okaze de tiu Forumo vi povos ekscii pri la preciza laboro de prezidanto kaj vicprezidanto, du postenoj, kiuj bezonas novan respondeculon.  Dua Forumo por ILEI-gvidantoj | Eventa Servo

Por demandoj aŭ sinproponoj bonvolu turni vin al la prezidanto de la Elekta Komisiono Aurora Bute Rumanio .


Kotonuo. 2021-02-07

Mireille Grosjean  prezidanto de ILEI



INK-konkurso

Akademio Literatura de Esperanto invitas



Interkultura Novelo-Konkurso (INK) estas konkurso organizata de Akademio
Literatura de Esperanto kaj aǔspiciata de Universala Esperanto-Asocio,
celanta instigi aktualan novelan kreadon de aŭtoroj el diversaj
kulturoj. Sama temo, malsamaj vidpunktoj, malsamaj historioj…

La temo de la konkurso estis voĉdonita rete: “KOVIM-19: Kiel ĝi ŝanĝis
nin”. Aŭtoroj estas nun invitataj verki novelojn pri ĉi tiu temo kaj
sendi ilin per reta formularo antaŭ la 20-a de junio 2021.

Pensu: la nova koronviruso, kiel ĝi ŝanĝis vian vivon aŭ la mondon? Per
ĉi tiu temo, vi povas trovi inspiron por skribi fikcian rakonton
okazantan en la pasinto (dum la unuaj – kelkfoje frenezaj – monatoj de
la pandemio), nuntempe (kiam pandemio iĝis preskaŭ kutima afero de la
vivo) aŭ en la estonto (post jaroj, jardekoj aŭ eĉ pli… kia estos nia
mondo?)

La tekstoj havos maksimume 12 000 karaktrojn (proksimume 6 paĝoj). Ne
estas minimuma longeco. Poste, interkultura ĵurio taksos la novelojn kaj
anoncos gajnintojn dum la 107a Universala Kongreso de Universala
Esperanto-Asocio en Montrealo, somere 2022. La aŭtoroj de la tri
gajnintaj noveloj ricevos premion de 500, 300 kaj 200 eŭroj, respektive.
Finalistajn novelojn oni povos legi en rete publikigota novelaro.

Ĉu vi ŝatas literaturon, novelojn, novelkonkursojn, INK-on? Ni volas
aŭdi pri vi!
--
Akademio Literatura de Esperanto
www.akademio-literatura.org



Internacia Tago de Edukado, 24 januaro 2021

Gazetaraj Komunikoj de UEA
N-ro 926
2021-01-21


MESAĜO OKAZE DE LA INTERNACIA TAGO DE EDUKADO, 24 JANUARO 2021

[ Mesaĝo sendota al UN. Kun afabla peto republikigi ĝin en viaj lokaj kaj landaj gazetoj kaj aperigi ĝin en viaj aliaj komunikiloj. Dankon! ]

Universala Esperanto-Asocio (UEA) kunagas kun la Internacia Ligo de Esperantistaj Instruistoj (ILEI) kaj la Tutmonda Esperantista Junulara Organizo (TEJO) en tiu ĉi mesaĝo okaze de la Internacia Tago de Edukado 2021.

Jam antaŭ dudek jaroj, forumo en Dakaro organizita de Unesko skizis la plej urĝajn tutmondajn paŝojn farendajn sur la kampo de edukado, inkluzive la jenajn:

  • La ŝtatoj fortigu la protektadon kaj instruadon de ĉiuj junaj infanoj, ĉefe tiuj malriĉaj kaj tiuj minacatataj de ekskludo kaj/aŭ diskriminacio.
  • La infanoj el etnaj malplimultoj ricevu apartan atenton en la edukado.
  • Aliro al adekvataj instruprogramoj estu garantiata al ĉiuj, cele al kontentigo de la bazaj bezonoj kaj aktiva civitana vivo.
  • Aliro al instruo estu havebla de ĉiuj homoj, ne nur en infaneco sed tra la tuta vivo.
  • La rezultoj de la instruado devas esti takseblaj kaj devas ebligi ĉiujn agadojn de la kutima vivo: legadon, skribadon, kalkuladon.

Eĉ se tiuj principoj aperis en la jaro 2000, la vojo al ilia plenumo estas ankoraŭ longa.

La mondo enorme ŝanĝiĝis en tiuj dudek jaroj pro la apero de novtipaj komunikiloj. La ciferecigo kaj la Interreto alportas malĝustajn faktojn kaj novajn danĝerojn, sed ankaŭ ebligas novajn manierojn instrui kaj lerni. Unu el la trafitaj fakoj estas tiu de ne-formala edukado, kie la plimulto de junularaj trejnadoj distanciĝis de fizikaj renkontiĝoj kaj transiris al la reto. Cifereca edukado (en lernejoj, universitatoj, junularaj agadoj kaj trejnadoj) povas prezenti vojon al la estonteco, se la koncernaj roluloj povos certigi, ke ĉi tiuj strukturoj estu alireblaj por ĉiuj kaj la rajtoj de partoprenantoj estu respektataj, eĉ en cifereca medio. La pandemia jaro 2020 montris, ke la reto ebligas kontaktojn kaj diskutadon tra la tuta mondo, ekzemple inter afrikanoj, kiuj ne povus fizike atingi kunvenojn en Eŭropo.

Jam antaŭ la komunika revolucio, afrikanoj esprimis la deziron, ke aperu en la internacia lingvo Esperanto bazaj informoj pri ĉiuj fakoj, “tiel ke ni povu aliri al scioj sen uzi la koloniajn lingvojn.” Tio nun eblas per la uzo de Vikipedio, la libera enciklopedio, kiu la 15-an de januaro 2021 fariĝis 20-jara. La versio de Vikipedio en Esperanto nombras nun pli ol 290 000 artikolojn, do iom post iom konkretiĝas tiu deziro de afrikanoj. Samtempe, Esperanto-laborgrupo pri universitatoj nun esploras novajn manierojn utiligi Esperanton kiel lingvon de universitata lernado kaj instruado.

La tuta demando de la lingvo de instruado bezonas pli intensan atenton je ĉiuj niveloj. Ni favoras la uzon de la denaska lingvo de la lernantoj en la baza edukado, kaj la lernadon de aliaj lingvoj, inkluzive de Esperanto, en postaj jaroj por pli vasta komunikado. Ni estas firme kontraŭ ĉiu maljusta diskriminacio surbaze de la lingvo kiun oni parolas, kvankam tiu problemo persistas en multaj mondopartoj. Ni favoras edukadon al tutmonda civitaneco en lingve diversa mondo.

Ni estas tre konsciaj, ke la nuna Internacia Tago de Edukado okazas dum pandemio. La Monda Banko kalkulas, ke pliaj 72 milionoj da infanoj frontos analfabetecon pro la sekva limigo aŭ eĉ kolapso de lernejaj sistemoj en multaj mondaj regionoj. Multaj infanoj suferas pro malsato; aliaj pro malsano. La grandaj celoj de la Tagordo 2030 de Unuiĝintaj Nacioj suferas grandan, eĉ fatalan, baton.

Ni alvokas al ĉiuj homoj de bona volo, al la parolantoj de Esperanto tra la tuta mondo kaj al Unuiĝintaj Nacioj kaj Unesko, kuniĝi en spirito de kunlaboro por eduki niajn infanojn, kompensi la damaĝon de la pandemio, precipe por junuloj kaj vundeblaj grupoj, kaj retrovi la vojon al egaleco, prospero kaj memstaro proponata de efika tutmonda edukado.



TAGO DE HOLOKAŬSTA MEMORO, 27 JANUARO 2021

Gazetaraj Komunikoj de UEA
N-ro 925
2021-01-20


MESAĜO DE UEA OKAZE DE LA TAGO DE HOLOKAŬSTA MEMORO, 27 JANUARO 2021

[ Mesaĝo sendota al UN. Kun afabla peto republikigi ĝin en viaj lokaj kaj landaj gazetoj kaj aperigi ĝin en viaj aliaj komunikiloj. Dankon! ]

Ĉiujare, la 27-an de januaro, ni markas la Tagon de Holokaŭsta Memoro, tagon de funebrado pro la milionoj kiuj perdis la vivon kaj de honorigo de tiuj kuraĝaj individuoj kiuj helpis savi la vivon de aliaj kiuj aliokaze pereus. Universala Esperanto-Asocio aparte memoras la milojn de parolantoj de Esperanto kiuj pereis kaj, inter ili, la familianoj de L.L. Zamenhof, la kreinto de Esperanto. Lia lingvo estis identigita por aparta denuncado en la libro de Hitler Mein Kampf.

La tagon post la alveno de la armeo de Hitler en Varsovion, la familianoj Zamenhof estis elserĉataj. La filo de L.L. Zamenhof, Adam, estis arestita kaj, komence de 1940, mortpafita; liaj filinoj Zofia kaj Lidia estis murditaj en Treblinka, kune kun lia fratino Ida, en 1942. Nur la filo de Adam, Ludwik, mirakle transvivis, dank’ al ne nur sia lerteco sed ankaŭ al la ŝirmado donita al li kaj lia patrino de Pastro Marceli Godlewski, de la Paroĥo de Ĉiuj Sanktuloj, en la Placo Grzybowski en Varsovio. Pastro Godlewski, kaj aliaj personoj similaj al li, tiel helpis transvivigi tiun esperon kiun oni trovas eĉ en la nomo mem de Esperanto.

La pola historiistino Zofia Banet-Fornalowa speciale funebris kelkajn plej bone konatajn Esperanto-parolantajn viktimojn de Hitler, kaj la germana historiisto Ulrich Lins, en sia libro La Danĝera Lingvo, donis al ni ĝeneralan pritakson de la vasteco de la murdoj. Multaj aliaj mortis plejparte nekonataj kaj tro facile forgesataj.

La Esperanto-movado aparte funebras tiujn kredantojn pri internaciismo kaj internacia kompreniĝo kiuj, ĉu pro sia raso aŭ fizika stato, ĉu pro siaj politikaj aŭ sociaj konvinkoj pereis je la manoj de la Nazioj. Inter ili estis multnombraj esperantistoj en Germanio, Pollando, Hungario, Ĉeĥoslovakio kaj aliloke. Ili inkluzivis esperantistajn ŝtatoficistojn, instruistojn, kuracistojn, ĵurnalistojn, poetojn. Kaj inter la travivantoj estis ankaŭ esperantistaj herooj kiuj ŝirmis aliajn for de ekstermiĝo.

Temas ankaŭ pri tago kiam ni memoras tiujn kiuj ne rezistis aŭ ne povis rezisti tiun tiranecon kaj buĉadon; kaj ni promesas, antaŭ la ekzemplo de la Holokaŭsto, kontraŭstari maljustecon kie kaj kiam ajn ĝi okazas. Ni eble memoras la vortojn de la esperantista poeto Leen Deij, kiu verkante en 1948 kaj funebrante judan najbaron, esprimis sentojn kiuj rilatas al ĉiuj gentoj kaj ĉiuj religioj.

Ni sentis kompaton kaj monon kolektis,
dum kelkaj el ni la infanojn protektis.
Sed Auschwitz ekzistis! Nu, kion plu diri?
Ke mi kaj ke vi… ni lin lasis foriri.

Universala Esperanto-Asocio honoras la memoron de la multaj esperantistoj kiuj pereis per la manoj de la Nazioj kaj rekonas la sindonon kaj kuraĝon de tiuj kiuj defiis la fortojn de teroro por savi tiujn malmultajn kiuj, minacataj de murdo, transvivis.



Tri Esperanto-kursoj

Tri Esperanto-kursoj, pri lingvo; verkado de tekstoj; profunda kompreno de literaturo, gvidotaj en Interreto, vive  

Eble povus plibeligi viajn tagojn regula renkontiĝado kun afablaj gesamideanoj, dum lernado. La fama Jagelona Universitato en Krakovo, Pollando, proponas al esperantistoj de la tuta mondo tri diversajn kursojn.

---------

kurso 1

Kuraĝe korektu viajn lingvajn erarojn

Estas iom hontige fari tro multajn erarojn… Agrable kaj kuraĝe korektu ĉiajn malperfektaĵojn en via lingvouzo, sub gvido de instruistino. Vi ricevos multe da helpo pri la individua uzado de la lingvo.


kurso 2

Kurso por verkemuloj

Ripeto de la sukcesa kurso el la pasinta jaro. Por verkantoj de diversaj tekstoj. La skribaj aktivaĵoj ampleksos leksikon, gramatikon, donos specialan atenton al sintakso kaj zorgado pri stilo. La programo respektos la individuan stilon de la partoprenantoj, okazos laboro pri ties disvolvado, krome, lernado per la stilo de modelaj verkintoj de la Esperanto-literaturo. 


kurso 3

Kompreni la lingvaĵon de aŭtoroj de esperantaj  beletraj verkoj kaj lerni la lingvon per literaturo


Kurso por kiu? Por ŝatantoj de literaturo, por legemaj personoj, fakuloj pri beletro, esploristoj (vidi unikan, aŭtoran metodon).

La partoprenantoj enprofundiĝos en tekstojn por vidi, kion la aŭtoroj reale diras (ne „volis diri”, kiel oni ofte diras en lernejoj), kiel ili esprimas ideojn, emociojn ktp. per vortoj. Oni esploros la fundon de la tekstoj. La lernado multe pliriĉigos la komprenon de beletro kaj influos la kapablon de la partoprenanto verki.

_______

5-monataj kursoj (ekde la komenco de januaro 2021), kun lecionoj okazantaj 1-foje semajne.

La oficialaj konfirmiloj pri la partopreno enhavas krom la konfirmo kaj blazono de la universitato, la markon de la prestiĝa, internacia EAQUALS-kvalito de la Esperanto-instruado en la Jagelona Universitato, kio plialtigas ilian internacian prestiĝon.


Limdato por aliĝi:  20 decembro 2020 (eblas ankaŭ poste, laŭ disponeblaj lokoj).

Pli da informoj pri la kursoj: https://bit.ly/37MIYye

(aŭ    https://docs.google.com/document/d/1JvimMeNl-nc3VJhi44f6NjbzDuaZvepiVRl0BYdEW5c/preview)

 

Se, studinte ĉiujn informojn en la ĉi-supre indikita retpaĝo, vi decidis ALIĜI, bv. skribi al: esperanto.instruado.jag.univ.pl(ĉe)gmail.com  (ni publikigas la adreson de la kursoj en tia kontraŭ-spama formo).

 

Invitas vin kore

Maria Majerczak

Gvidantino de la Esperanto-instruado en la Jagelona Universitato  



Revivga projekto de la virtuala kongreso

Gazetaraj Komunikoj de UEA
N-ro 916
2020-11-29


REVIVIGA PROJEKTO DE LA VIRTUALA KONGRESO

Ĉiuj VK-spektaĵoj baldaŭ en la JuTuba kanalo de UEA, UEAviva.

Pli ol du mil membroj de UEA partoprenis aŭ poste spektis la programriĉan Virtualan Kongreson (VK) sen lasi sian hejmon. Por konservi tiun unikan sperton, UEA lanĉis la projekton Viva Virtuala Kongreso (VVK) en la JuTuba kanalo UEAviva (youtube.com/user/UEAviva). Sekve ĉiuj esperantistoj nun povas libere sperti kaj rememori pri tiu kongreso. Jam du monatojn, iom post iom oni enretigas la programerojn de la kerna VK, tio estas, la spektaĵojn okazintajn dum VK-semajno (1-8 de aŭgusto) ĉiutage inter la 12-18-a horo UTC.

Por konservi la kongresan strukturon kaj por faciligi trovi ĉiun programeron estis kunmetitaj tabelo (<Programtabelo de la Virtuala Kongreso>) kaj listo (<Listo de prelegoj kun videoj>) de programeroj, similaj al tiuj de UK. La listo kaj la tabelo estas libere alireblaj ankaŭ en mondafest.net/programo. La diversaj programeroj en la listo kaj tabelo estas kolorigitaj laŭ sia speco, ekzemple Kongresa temo, sciencaj programeroj (! IKU, AIS, Scienca Kafejo), distraj (koncertoj, kantaj aŭ muzikaj eroj), kulturaj (literaturo, aŭtoraj momentoj), ekskursoj, prelegoj ktp.

Fine de la projekto estos videblaj ĉiuj spektaĵoj de la kerna VK-programo. Entute estas 99 programeroj, el kiuj pli ol 70 jam estas alŝutitaj al la kanalo de UEA en JuTubo; ĉiutage aldoniĝas unu programero.

UEA esperas, ke en tiu formo la unua Virtuala Kongreso de Esperanto plej utile konserviĝos en la reto kaj estos facile alirebla por ĉiuj esperantistoj. Kiel servo al la E-komunumo, UEA aparte invitas tiujn, kiuj siatempe ne povis partopreni, sperti la unuan Virtualan Kongreson per JuTubo.



CED REORGANIZIĜAS SUB NOVA ESTRARO

Gazetaraj Komunikoj de UEA
N-ro 914
2020-11-03


CED REORGANIZIĜAS SUB NOVA ESTRARO

La Centro de Esploro kaj Dokumentado (CED) estas branĉo de UEA, fondita en 1952 de Ivo Lapenna, kaj respondeca pri scienca esplorado pri la fenomeno Esperanto, ĝia movado kaj komunumo, kaj ĝia videbligo en sciencaj kaj intelektulaj rondoj ekster la movado.

En aŭgusto 2020 Humphrey Tonkin, la direktoro de CED dum pli ol kvar jardekoj, transdonis sian gvidan postenon al Mark Fettes. Kunlaborantoj jam de multaj jaroj, la du universitataj profesoroj kaj eksprezidantoj de UEA interkonsentis pri la elprovo de nova organiza formo por tiu plej longdaŭra esplora centro de la Esperanto-movado.

CED nun konsistas el Konsilantaro, kiun nomumas la Estraro de UEA. En ĉi tiu momento, tiu Konsilantaro konsistas el jenaj homoj: Xavi Alcalde, Irene Caligaris, Renato Corsetti, Mark Fettes, Guilherme Moreira Fians, Michele Gazzola, Federico Gobbo, Kimura Goro, Alessandra Madella, Mélanie Maradan, A Giridhar Rao, Orlando E. Raola, Ida Stria, Angela Tellier, Humphrey Tonkin kaj Bernhard Tuider.

El inter la anoj de la Konsilantaro, Fettes kunmetis malgrandan estraron kun respondeco pri kvin ĉefaj agadkampoj, jene:

1. Esperantologio kaj interlingvistiko - Guilherme Moreira Fians (Esperantologiaj Konferencoj, revuo “Esperantologio”)
2. Lingvopolitiko, precipe en internacia/interŝtata kadro - Michele Gazzola (LPLP, Nitobe-simpozioj)
3. Universitataj studprogramoj (pri Eo kaj rilataj temoj) - Angela Tellier (precipe kunordigo de projektoj por subteni/disvastigi tiajn programojn)
4. Bibliotekoj - Orlando Raola (unuavice Biblioteko Hodler; krome kunlaboro inter E-bibliotekoj ĝenerale)
5. Terminologio - ankoraŭ vaka (rilatoj de UEA kun TermNet, Infoterm; terminologia trejnado)

La bulteno "Informilo por Interlingvistoj” estas komuna informilo pri ĉiuj tiuj kampoj. Nuntempe ĝin redaktas Angela Tellier kun subteno de ESF (Esperantic Studies Foundation). La t.n. CED-Fonduso, same subtenata de ESF, donas modestajn subvenciojn por projektoj sur tiuj kampoj (unuavice Kampo 1). Pri la rilatoj inter ESF kaj CED Fettes mem zorgos, estante samtempe estrarano de ESF; Raola, kiel ano de la Estraro de UEA, zorgos pri ĝiaj rilatoj kun CED.

Demandoj kaj esprimoj de interesiĝo pri la laboro de CED estas bonvenaj ĉe la Direktoro, Mark Fettes <>.



El Norvega Esperantisto numero 5 2020

La prezidanto:
 
Nova kunlaboro kun niaj najbaraj landoj Mi jam certe skribis multe pri tio, kiom gravas bona kunlaboro inter homoj kaj organizoj. Ofte oni ekhavas pli multon por fari, por kio ŝajne mankas jam la energio, aŭ eble oni havas nur la samajn taskojn, sed la tempo aŭ la forto ne sufiĉas pro io. Ĉiukaze estas tre bone, se tiam oni povus dividi la taskojn kun iu, kiu eble havas la saman situacion, sed per plano kaj klara strukturo oni kune kapablas pli bone iri antaŭen. Tiel estas pri landoj, socioj, organizoj, sed ankaŭ en familioj aŭ ekzemple en nia estraro. 

Oni atingas pli da rezultoj kunigante siajn fortojn. En Esperantujo tio ŝajnus esti simpla afero, ni havas komunan lingvon kaj verŝajne komunan celon. Eĉ se temas pri Esperanto-organizoj en Skandinavio, tiam la kunlaboro devus esti natura kaj eĉ deviga konsiderante, ke tiuj landoj jam estas konektitaj per mil fadenoj. Ni komencis (aŭ pli ĝuste rekomencis) la kunagadon per nia dua skandinava kongreso en 2018 surŝipe inter Kopenhago kaj Oslo, kaj jam nun estas planoj pri la tria skandinava kongreso printempe en 2021. Ni esperu, ke la pandemio ne malhelpos realigi ĝin! 

Antaŭ nelonge NEL interkonsentis kun la Sveda Esperanto-Federacio pri tio, ke niaj membroj senpage ricevos la retversion de ilia membrogazeto, La Espero, kaj interŝanĝe la svedaj esperantistoj ricevos nian Norvega Esperantisto. Tio certe kontribuos al tio, ke pli da niaj membroj legos kaj konatiĝos pri la sveda movado. Tio estas grava kaj bona paŝo, kiun povus sekvi aliaj, ekzemple sama interkonsento kun la dana E-organizo, aŭ eĉ eldonado de komunaj numeroj.

 Al nia reta seminario en novembro (pri kiu vi povos legi en paĝo 4) ni invitas ankaŭ esperantistojn el Svedio kaj Danio. Ni povos aŭskulti la prelegon de Stefan MacGill kaj diskuti pri tio, kiel ni kune povos rejunigi nian komunumon en Skandinavio. Do, ne forgesu aliĝi kaj partopreni ĝin! 

Mario Machlik  


 Aliĝu al reta seminario de NEL sabaton la 21an de novembro

 Laŭtradicie NEL aranĝas seminarion en la jaroj sen landa kongreso. Dum tiuj seminarioj ni havas gastpreleganton, kiel Peter Baláž, kiu prezentis la organizon E@I, aŭ Lu Wunsch-Rolshoven, kiu prelegis pri informado pri E-o. Kelkfoje niaj propraj membroj elektas interesan temon por prezenti, kiel en 2014 (artefaritaj lingvoj), aŭ lastfoje antaŭ du jaroj dum la skandinava kongreso (diversaj temoj). 

Ĉi-jare Stefan MacGill estos nia gasto. Li estas bone konata esperantisto, verkisto, redaktoro, antaŭa vicprezidanto de UEA, eksprezidanto de ILEI, kiu nuntempe ĉefe okupiĝas pri organizado de seminarioj de AMo (Aktivula Maturigo). La titolo de lia prelego estos: «Rejunigo de la skandinava komunumo». Kiel novaĵon, nun ni invitos ankaŭ esperantistojn el Svedio kaj Danio por priparoli kiel ni povus daŭrigi kaj plifortigi nian kunlaboron.

La seminario okazos interrete per Zoom sabaton la 21an de novembro de la 15a horo ĝis proksimume la 17a horo. Vi povas aliĝi sendante retmesaĝon al , prefere antaŭ dimanĉo la 15a de novembro. La plej grandaj kluboj (Oslo, Trondhejmo kaj Tromsø) verŝajne organizos kunvenon ankaŭ ĉi-foje, kiun la klubanoj povos kune partopreni. 

Bonvenon al la seminario en novembro! ––––––––––––––––––––––––––––––––––––––––––––––  

(Noto de A-L Åkerlund: Mi bedaurinde ne povis kopii la ligilon al la gazeto mem.)


Please publish modules in offcanvas position.